UEFA Çempionlar liqasının 6-cı turunda “Real” Mönhenqladabax “Borussiya”sını qəbul edəcək. Azarkeşlər görüşü böyük həyəcanla gözləyir. Çünki, Madrid təmsilçisi qələbə qazanacağı halda pley-offa yüksələcək. “Borussiya”ya isə növbəti mərhələ üçün 1 xal da kifayət edir. “Real”ın baş məşqçisi Zinəddin Zidan matçın çətin keçəcəyini bildirib: “Çətin görüş olacaq. Taleyimiz öz əlimizdədir. Yalnız qələbə barədə düşünürük. 3 xal əldə edib pley-offa çıxmaq niyyətindədiyik. Azarkeşləri fantastik oyun gözləyir. Ümid edirəm, hər şey istədiyimiz kimi olar”.
Mönhenqladbax “Borussiya”sının baş məşqçisi Marko Roze isə ən az 1 xal üçün əllərindən gələni edəcəklərini bildirib: “Bizə ən az 1 xal lazımdır. Bunun üçün meydanın hər qarışı uğrunda mübarizə aparacağıq. Bu görüş bizim üçün final matçıdır. Xarakter nümayiş etdirməliyik. Düzdür, matçın “Real” üçün necə vacib olduğunu bilirik. Amma biz Madridə turist kimi gəlməmişik”.
Qeyd edək ki, “Real” – “Borussiya” Mönhenqladbax görüşü gecə yarısı başlanacaq.